Leo is lid gewore van ’t Broedersjap op 26 april 2016 dus noe mieë den 9 jaor geleje.
Es tummerman woor hae biej ’t Broedersjap natuurlik good op zien plaats.
De ieëste opdrach dae hae vervöldje woor ’t make van eine kas wo weer de persuuënlikke beerkroeke van edere broeder in kóste plaatse.
Lei maakdje dao neet väöl kal óm, det woor ouch neet ziene aard.
Dus dit karweitje woor zoa gepiep en natuurlik waerdje de kas ingewied mit eine behuuërlikke wénsdrónk oet de beerkroeke, väördet ze inne kas waerdje gezatj.
Lei woor eine mins van weinig wäörd mer es hae get zag den woor det altied ein rake opmerking.
Waat mich zelf waal in persuuënlikke gesprekke, die weer waal éns mit ein hawwe op veel, woor det hae ’t verlees van ziene zoon Hugo hieël moeilijk ein plaats kós gaeve. Hae kaldje dao ouch lever neet dan waal äöver.
Es hae den weer éns eine kiëer väör zich oet zoot te stare en doe vroogs: “en Lei, wo dénk se aan?” den zag hae altied, “aan niks, ich loester nao uch want geer kaltj genog”.
Väör ós, ’t Broedersjap, waerdje ein paar jaor geleje, ein tiedje nao oze jaorlikse “Daag van de Broeders” dudelik det get anges mit Lei aan de handj woor.
Weer wore op dae jaorlikse Daag vanne Broeders in Putbrook biej Ien gelandj väör ein Beerpreuverie.
‘t Woor taege 2 oere ’s-smiddes aan wie weer mit de fiets verder ginge nao de volgendje halte. Weer hawwe toen ech nog neet väöl gedrónke want weer wore pas 2 oere óngerwaeg.
Ómdet weer in gruupkes vanaaf Ien wore vertrokke, bleek eigelik pas biej de volgendje halte det Lei kort biej de kefee in Pötbrook mit de fiets woor gevalle en det hae mit de ziekewage nao ’t ziekenhoes woor verveurdj.
Weer dachte, hae weurdj in ’t ziekenhoes naogekeke en den slutj hae missjien weer biej ós aan. Mer det woor helaas ein misvatting.
Lei woor vanaaf toen neet mieë wie hae eerder woor.
Oet óngerzeuke die toen volgdje bleek det d’r toch waal get mieë aan de handj woor en hae eigelik al behuuërlik krank woor.
Hae haet det, väör de boetewaereld althans, toch waal eine tied kenne verblome mer vanaaf toen ging ‘t den ouch erg snel.
Hae waerdje nao ein tiedje opgenómme in ’t Pejjer Hoes.
Weer höbbe ‘m dao ein paar kieër opgezóg en dao bleek det hae stieeds moeilikker kós communicere. Ouch dit woor moeilik váór ‘m, det zoog se gewuuen aan ‘m.
Weer höbbe es Broedersjap toen nog váór alle bewoners vanne Pejjer Haof ein klein fieësje gesponserdj, mit kóffie, vlaai en meziek van ein Limburgse troubadour.
Det waerdje toen door alle bewoners erg op pries gesteldj en ouch weer, aanwezig es de vertegewoordigers van ’t Broedersjap, höbbe det es ein groat good en plezeer ervare, det weer dit väör die minse höbbe kenne doon.
En toen plotseling op maondig 23 juni 2025 óm ein oer of ellef ’s-murges kömp dao ein berichje van Helma det Lei óm hallef ellef is äöverleje.
Dit berich koom neet hieëlemaol ónverwach mer waal väöl te vreug en erg plotseling.
De Broeders van ’t Broedersjap, mit häöre aanhang, wénse Helma mit zien femilie, vrunj en bekéndje, hieël väöl sterktje mit dit verlees van Lei, Broeder Carpenter.
Ich sloet noe aaf mit de spreuk van ’t Broedersjap:
Broeder Carpenter
Nemo Pro Se Vivit
Nemes laef väör zich allein
Mer ouch
Broeder Carpenter
Nemo Solus Moritur
Nemes sturf väör zich allein
